PDP Ta Tsayar da Aminu Wada Abubakar a Matsayin Ɗan Takarar Sanatan Jigawa ta Kudu maso Yamma
Jam’iyyar Peoples Democratic Party (PDP) a Jihar Jigawa ta amince da Aminu Wada Abubakar a matsayin ɗan takarar bai ɗaya na kujerar Sanatan Jigawa ta Kudu maso Yamma gabanin babban zaɓen shekarar 2027.
Aminu Wada Abubakar, wanda aka fi sani da sarautarsa ta Dokajin Dutse, ya samu karɓuwa daga magoya bayansa a matsayin wani sabon ci gaba a siyasar yankin, inda da dama ke kallon hakan a matsayin sauyi zuwa wakilci mai haɗa kan jama’a da bai wa matasa dama.
Da yake jawabi bayan karɓar fom ɗin tsayawa takarar, Aminu Wada Abubakar ya yi alƙawarin tallafa wa dokoki da manufofin da za su inganta rayuwar matasa da mata ta hanyar noma, ilimi, koyon sana’o’i, kiwon lafiya da shirye-shiryen bunƙasa tattalin arziƙi.
Dokajin Dutse, tare da ɗaruruwan magoya baya da masu biyayya ga jam’iyyar, sun kai ziyara sakatariyar PDP ta jihar da ke Dutse domin karɓar fom ɗin nuna sha’awa da na takara cikin murna da tafi daga magoya bayan jam’iyyar.
A cewarsa, manufarsa ita ce ƙarfafa dogaro da kai, rage talauci da samar da damarmaki masu ɗorewa ga marasa galihu a faɗin yankin sanatan.
“Abin da ke faruwa a ƙasar nan a yau, musamman a Arewacin Najeriya, na buƙatar shugabannin da za su bai wa ƙarfafa tattalin arziƙi, ilimi da bunƙasa rayuwar jama’a muhimmanci,” in ji shi.
Ya ƙara da cewa za su tallafa wa manufofin da za su bunƙasa noma, samar da ayyukan yi ga matasa, ƙarfafa mata da kuma koyar da sana’o’i domin jama’a su dogara da kansu.
Aminu Wada Abubakar ya kuma bayyana cewa fifikon ayyukansa a majalisa zai haɗa da bunƙasa ilimi, inganta ayyukan kiwon lafiya da shirye-shiryen ci gaban karkara domin inganta rayuwar al’umma.
Ya jaddada buƙatar samun ƙarin goyon bayan majalisa wajen bunƙasa noma da samar da damarmaki ga mata da matasan da ke sana’o’in noma da ƙananan kasuwanci.
Ɗan takarar ya gode wa shugabannin jam’iyya da magoya baya bisa amincewar da suka nuna masa, tare da yabawa tsohon gwamnan Jihar Jigawa, Alhaji Sule Lamido, kan goyon baya da jagorancin da yake ba shi.
“Ina matuƙar godiya ga goyon baya, shawarwari da kulawar uba da Baba Alhaji Sule Lamido ke ba ni,” in ji shi.
Ya kuma ce PDP na da ƙarfi kuma a shirye take ta fafata da jam’iyyar All Progressives Congress (APC) mai mulki a Jigawa a zaɓen 2027.
Aminu Wada Abubakar ɗa ne ga marigayi Alhaji Wada Abubakar, wanda ya taɓa zama Mataimakin Gwamna ga Gwamna Sabo Bakin Zuwo a tsohuwar Jihar Kano a ƙarƙashin jam’iyyar Peoples Redemption Party (PRP) a jamhuriya ta biyu.
