Vijay Ya Sha Rantsuwa a Sabuwar Gwamnatin Tamil Nadu Bayan Nasarar TVK a Zaɓe

Shugaban jam’iyyar Tamilaga Vettri Kazhagam (TVK), Vijay, ya karɓi rantsuwar fara sabuwar gwamnatin Jihar Tamil Nadu a ranar Lahadi bayan samun goyon bayan jam’iyyun Viduthalai Chiruthaigal Katchi (VCK) da Indian Union Muslim League (IUML), lamarin da ya ba shi goyon bayan ƴan majalisa 120, ƙarin biyu sama da rinjayen kujeru 118 da ake buƙata domin kafa gwamnati.

Rahoton jaridar The Times of India ya ce jam’iyyar TVK ta samu cikakkiyar rajista a matsayin halastacciyar jam’iyyar siyasa bayan samun ƙuri’u sama da miliyan 50 a zaɓen majalisar dokokin Tamil Nadu na farko da ta shiga.

Jarumin fina-finan Tamil kuma wanda ya kafa jam’iyyar, Vijay, ya jagoranci kamfen ɗin jam’iyyar kai tsaye, inda ya samu gagarumin rinjaye a mazaɓun Perambur da Trichy ta Gabas.

Sakamakon zaɓen ya nuna wani sabon sauyi a siyasar Tamil Nadu, tare da nuna cewa masu kaɗa ƙuri’a a jihar na neman sauyin siyasa mai ƙarfi bayan shekaru na mamayar jam’iyyun DMK da AIADMK.

Rahoton ya ce ana kwatanta Vijay da marigayi M.G. Ramachandran (MGR), fitaccen jarumin da ya yi fice a siyasar Tamil Nadu bayan barin harkar fim.

Sai dai yayin da MGR bai taɓa nuna shan giya ko taɓa sigari a fina-finansa ba, Vijay ya taka rawa a matsayin malami mashayi, ɗan daba da kuma mutum mai rikice-rikicen ɗabi’a a wasu fina-finansa, duk da haka yana ci gaba da samun karɓuwa a siyasa.

Vijay ya gudanar da kamfen ɗinsa ta wata hanya ta dabam, inda ya guje wa yawan hira da kafafen yaɗa labarai tare da rage yawan gangamin siyasa idan aka kwatanta da Babban Ministan jihar M.K. Stalin da jagoran adawa Edappadi K. Palaniswami.

A ranar ƙarshe ta kamfen, Vijay ya busa usur, wanda shi ne alamar jam’iyyarsa, tare da cewa: “Ku ba ni abu ɗaya da nake nema — ƙuri’arku — ni kuma zan ba ku duk abin da kuke nema na tsawon shekaru biyar.”

A wani ci gaban siyasa mai muhimmanci, jam’iyyar Amma Makkal Munnettra Kazagam (AMMK) ta bayyana goyon bayanta ga jam’iyyar All India Anna Dravida Munnetra Kazhagam (AIADMK), tare da roƙon gwamnan jihar ya bai wa jam’iyyar damar kafa gwamnati.

Babban Sakataren AMMK, TTV Dhinakaran, ya bayyana hakan ne cikin wata wasiƙa da ya aikewa gwamnan Tamil Nadu, Rajendra Vishwanath Arlekar, inda ya nuna goyon bayansa ga iƙirarin shugaban AIADMK, Edappadi K. Palaniswami, na kafa gwamnati.

Dhinakaran ya ce ɗan majalisar da jam’iyyarsa ta samu, Kamaraj S daga mazaɓar Mannargudi, shi ma ya rattaba hannu domin nuna goyon baya ga matakin.

Sai dai duk da wannan goyon baya, Vijay ya samu isasshen rinjaye domin kafa gwamnati tare da zama sabon shugaban gwamnatin Tamil Nadu.